तिज गीत 'नक्कले साइँली' बजारमा (भिडियोसहित)

काठमाडौँ - इन्जिनियरिङ पेसा सँगै गीत सङ्गीतमा रुचि राख्ने अनिल पौडेलको अभिनय रहेको तीज गीत 'नक्कले साइँली' सार्वजनिक भएको छ । 

गाउँघरमा भाकालाई टपक्क टिपेर गीत सिर्जना गर्न खप्पिस  गायक तथा सर्जक मोतीराज खनाल र कल्पना विष्टको आवाजमा गीत सार्वजनिक गरिएको हो ।

गीतको शब्द र सङ्गीत  पनि खनाल स्वयमको रहेको छ । 

सङ्गीत संयोजन रमेश सेन्चुरीकाे रहेको यस गीतकाे भिडियोलाई सुरज खनालले निर्देशन गरेका छन् । म्युजिक भिडियोमा पौडेलसँगै भुवन पोखरेल, जुना कार्की र सुबुही शाहीको पनि अभिनय रहेको छ ।

लामो समयदेखि इन्जिनियरिङ पेसामा रहेका पौडेलले नेपालको मौलिक गीतसङ्गीत, गाउँघरका भाका तथा कला संस्कृतिको जगेर्ना गर्न गीत मार्फत केही प्रयत्न गरेको बताए । मौलिक भाकाहरूलाई अघिल्लो पुस्ताबाट नयाँ पुस्तामा पुस्तान्तरण गर्न युवाहरूको विशेष भूमिका रहने भएकाले मुख्य पेसाबाहेक गीत सङ्गीतमा आफ्नो विशेष रुचि रहेको बताए । 

संसा फिल्मस् युट्युब च्यानलबाट गीत सार्वजनिक भएको केही दिनमै निकै लोकप्रिय भएको गायक खनाल बताउँछन् । 

नारीहरूको महान् चाड हरितालिका तिज नजिकिँदै गर्दा बुधवार विशेष कार्यक्रमका बिच उक्त गीत सार्वजनिक गरिएको हो ।

भिडियो