एफक्युबमा मध्यरातमा दर्शकसँग पल शाहको भेट

काठमाडौँ - प्रदर्शनरत फिल्म ‘पुजार सार्की’का नायक पल शाहले मङ्गलवारको मध्यरात फिल्मका दर्शकसँग भेट गरेका छन् । 

प्रदर्शनको छैटौँ दिन मङ्गलवार काठमाडौँको चाबहिलस्थित एफक्युब सिनेमामा साढे १० बजेको अन्तिम सो हेरेर निस्किएका दर्शकसँग फिल्म सकिएपछि मध्य राति १ बजे भेट गरेका हुन् । दर्शक भेट्न पलसँगै निर्देशक दिनेश राउत, निर्माता सुवास भुसाल र नेपाल वितरक रोहित कट्टेल हल पुगेका थिए । दर्शकसँगको भेटमा पलले नेपाली फिल्मले निकै फड्को मारेको भन्दै खुसी व्यक्त गरेका थिए । ‘हामीले नेपाली फिल्मको सो जहिले पनि बढीमा नौ बजेसम्म हेथ्र्यौं । विदेशी डिमान्डेड फिल्महरू अबेर राती पनि चल्ने गरेका थिए । तर, आज भने हामी हाम्रै फिल्म हाउस फूल दर्शकसहित मध्यरात साढे १२ बज सकिएको प्रत्यक्षदर्शी भएका छौँ । रातीको सो देख्दा र दर्शकको उत्साह हेर्दा नेपाली फिल्मले निकै फड्को मारेको महसुस भएको छ,’ उनले भने ।

 पल गत आइतबार जापानको टोकियोमा भएको ऐतिहासिक सो सम्पन्न गरेर सोमबार साँझ काठमाडौँ उत्रिएका थिए । उनले जापान जसै गरी नेपालमा पनि नयाँ रेकर्ड राती सवा दश बजे भएको सो हुनसक्ने सम्भावना व्यक्त गरे । निर्देशक राउतले आफूले निर्देशन गरेका सबै फिल्महरूमध्ये ‘पुजार सार्की’ बढी सफल भइसकेको बताए । ‘व्यावसायिक सफलतासँगै समीक्षागत रूपमा पनि मैले निकै उत्कृष्ट प्रतिक्रिया पाइरहेको छु । मेरो एउटै सपना के हो भने मैले बनाउने फिल्म व्यावसायिक र समीक्षागत दुवै रूपमा सफल रहनु हो, जुन काम अत्यन्त कठिन र जोखिमपूर्ण छ ।

यो जोखिम मैले उठाएको थिएँ, सफल बन्दै छु भन्ने लागेको छ,’ राउत सुनिए । गत जेठ १० गते रिलिज भएको ‘पुजार सार्की’मा दर्शकको सङ्ख्या उल्लेख्य छ । फिल्ममा आर्यन सिग्देल, प्रदीप खड्का, पल शाह, अञ्जना बराइली, परीक्षा लिम्बु, मोहन निरौला, सुभाष गजुरेल, प्रेम सुब्बालगायतको अभिनय छ ।