बंगलादेशलाई हराउँदै नेपाल समुह विजेता

काठमाडौं– साफ यू–२० च्याम्पियनसिप फुटबल प्रतियोगिता अन्तर्गत बिहीवार दिउँसो खेलिएको समूह ‘ए’ को अन्तिम खेलमा घरेलु टोली नेपालले बंगलादेशलाई २–१ गोल अन्तरले पराजित गरेको छ ।

यो जीतसंगै नेपालले सेमीफाइनलमा स्थान सुरक्षित गरेको छ ।ललितपुरको सातदोबाटोस्थित एन्फा कम्प्लेक्सको मैदानमा खेलिएको यो खेलमा विजयी हुँदै नेपाल समुह विजेतासमेत बनेको हो । श्रीलंका दुई खेलमा पराजित भएसँगै समूह ‘ए’ बाट बंगलादेशलाई हराउँदै नेपाल समुह विजेता बनेको हो । नेपालले आफ्नो पहिलो खेलमा श्रीलंकालाई १–० गोलले पराजित गरेको थियो । समूह ‘ए’ को अन्तिम खेलमा तीनै गोल पहिलो हाफमा सम्भव भएको हो । पहिलो हाफको १५ औँ मिनेटमा नेपाली टोलीले सुरुवाती अग्रता बनाएको थियो । निराजन धामीको गोलमा नेपालले अग्रता बनाएलगत्तै १६ औँ मिनेटमा समिर तामाङको गोलमा नेपालले अग्रता दोब्बर पारेको थियो।

पहिलो हाफको इन्जुरी समयमा बंगलादेशले एक गोल फर्कायो । इस्लामको गोलमा बंगलादेशले खेलमा २–१ को अवस्थामा ल्याएको थियो । नेपालसंग आजको खेलमा हारे पनि बंगलादेश समूह उपविजेताको रुपमा सेमीफाइनलमा पुगेको छ । समूह ए बाट दुई खेलमा पराजित भएको श्रीलंका भने समूह चरणबाटै बाहिरिसकेको छ। नेपालले अब सेमिफाइनलमा समूह बी को उपविजेता टोलीसँग खेल्नेछ भने बंगलादेशले भने समूह ए को विजेतासँग खेल्नेछ । समुहमा ‘बी’ मा रहेका भारत, भुटान तथा मालदिभ्स तीनै टोलीको सेमिफाइनल पुग्ने सम्भावना बराबरी छ ।

समूह बी को अन्तिम खेलमा भोलि शुक्रवार भारत र मालदिभ्स खेल्नेछन् । यो खेलपछि सेमिफाइनल समिकरण पूरा हुनेछ । समूह बी मा भारत र भुटानले समान एक खेल जितेका छन् भने भारत र मालदिभ्सले एक खेल खेल्न बाँकी छ । भोलिको खेलमा भारतले मालदिभ्सलाई पराजित गरेमा भुटानले सेमिफाइनलको यात्रा तय गर्नेछ ।