‘कर्मा’ मा फरक किसिमबाट आमा बनेकी छु : अभिनेत्री गिरी

काठमाडौँ - अभिनेत्री सरिता गिरीले ‘कर्मा’ ले नेपाली फिल्मको आमा चरित्रको ट्यागलाइन नै परिवर्तन गरिदिने बताएकी छन् ।

अहिले आमाको चरित्र भन्ने बित्तिकै जुन इमेज आम दर्शक र फिल्मकर्मीको दिमागमा आउँछ, त्यो परिवर्तन ‘कर्मा’ ले गर्ने उनको धारणा छ ।  ‘आमाको चरित्र भन्ने बित्तिकै फिल्ममा सामान्य त हो नि भन्ने बुझाइ नै गलत हो’, गिरीले भनिन्– ‘कर्मा’ मा म परम्परागत आमा भन्दा क्यारेक्टरको आमा छु । जुन दर्शकको कल्पना बाहिरको छ ।’  फिल्ममा आमा भन्दा पनि चरित्रको रूपमा आफू जोडिएको उनको भनाई छ । आफूले अहिलेसम्म थुप्रै फिल्ममा आमाको क्यारेक्टरमा काम गरे पनि ‘कर्मा’ मा भनेर फरक खालको चरित्र रहेको उनको दाबी छ । 

‘मैले अहिलेसम्म आमाको चरित्र धेरै गरेँ होला । तर, ‘कर्मा’ मा आमाको चरित्र मात्रै छैन,’ उनी भन्छिन्, ‘आमासँग सँगै धेरै कुरा छ । त्यो फिल्ममा देख्न सकिन्छ ।’ ‘कर्मा’ मा गिरी अभिनेता विपिन कार्कीको आमाको भूमिकामा छिन् । फिल्ममा विपिन र सरितासँगै उपासनासिंह ठकुरी, मुकुन भुसाल, दिव्यदेव, बेन बस्नेत, सुज्यान सिलवाल, अनिल बुढाथोकी, निर्मल शर्मा लगायतको पनि अभिनय रहेको छ ।नयाँ वर्ष २०८२ को छेको पारेर प्रदर्शनमा आउन लागेको फिल्म सौरभ चौधरीले निर्देशन गरेका हुन् । एक्सन जनरामा निर्माण भएको ‘कर्मा’ मा ड्रामा, सस्पेन्स पनि रहेको बताइन्छ ।